Ku cyumweru tariki ya 25 Nyakanga 2010, mu mujyi wa Rubavu (Gisenyi) ubu usigaye witwa G CITY habereye igitaramo cy'imbaturamugabo cyo gushyira ahagaragara ibikorwa by'itsinda rigizwe n'abahagarariye abahanzi (Bwana BAGOYI SULTAN a.k.a BASUL), abahagarariye itangazamakuru (bahagarariwe na HABIMANA Dieudonné a.k.a Diddy ndetse n'abahagarariye abaterankunga b'abahanzi bahagarariwe na Madame UWANYIRIGIRA Jeanne d'Arc, iri tsinda rikaba ryariswe IKIRORI ARTISTS PROMOTION rigamije guteza imbere abahanzi bo mujyi wa Rubavu.

Nkuko rero byatangajwe n'abahagarariye iri tsinda bakaba bafite imigambi myinshi igamije guteza imbere abahanzi ndetse n'imyidagaduro muri rusange mu karere ka Rubavu.

Uyu munsi rero ukaba wari umunsi wo gutangiza kumugaragaro gahunda zitandukanye. Gahunda nyamukuru rero yatangijwe uyu munsi ikaba ari iyo bise GAL (Gisenyi Artists League) iri rikaba ari ihuriro ry'abahanzi bo mu mujyi wa Rubavu, ubu rimaze kwiyandikishamo abahanzi bageze kuri 70 kandi ikaba ifite gahunda zifatika zishobora kuzatuma abahanzi bo muri kariya gace bagera ku rwego rwo hejuru binyuze mu bufatanye n'abaharanira iterambere rya muzika nyarwanda by'umwihariko binyuze mu mubano wihariye hamwe n'inzu itunganya muzika ikanateza imbere abahanzi hano mu Rwanda ariyo TOP 5 SAI .

Muri iki gitaramo cyari gifite insanganyamatsiko igira iti « YES WE CAN » tugenekereje mu kinyarwanda igira iti "nibyo turabishoboye", abahanzi bo ku Gisenyi berekanye ko bashoboye gushimisha abakunzi ba muzika nk'abandi bahanzi dusanzwe tuzi ku rwego rw'igihugu ubwo baririmbaga maze abaje kureba bagahaguruka bakabyina kakahava aho ikirori cyaberaga muri gymnase ya Centre Culturel ya Gisenyi.

Bamwe mubahanzi bashimishije abitabiriye iki gitaramo ni nka : Groupe ABAMI KU KIRWA byagaragaye ko ikunzwe cyane, N T MISHIKI na team ye y'ababyinnyi, Groupe nshya igizwe n'abakobwa bavindimwe aribo C & J, n'abandi benshi.

Mubari bitabiriye ibi birori twavugamo nk'umuyobozi wa TOP 5 SAI company wari waje kwitabira ubutumire ndetse akaba yanashimishije abagize Gisenyi Artsists League kubwo kuba barashoboye kwishyira hamwe ngo bahuze ingufu ndetse anabasezeranya kumugaragaro ubufatanye n'umubano wihariye hagati y'iri huriro n'iyi company ya TOP 5SAI imaze kugira uburambe n'ubuzobere mu bijyanye na muzika hano mu Rwanda. Umuyobozi wa TOP 5 SAI akaba yanahise atera inkunga abahanzi bagera kuri batanu mubashoboye kwigaragaza uyu munsi mubari muri cyagice cy'abahanzi bazwi ku izina rya under ground mu karere ka Rubavu.

Post a comment or a suggestion