Nkuko twigeze kubibagezaho, umuhanzi Mihigo Kizito yateguye igitaramo cy'indirimbo z'Imana muri iki gihe twibuka Jenoside yakorewe abatutsi.

Uyu muhanzi uri kubarizwa I Kigali muri iyi minsi,atangaza ko iki gitaramo kizaba kigizwe n'indirimbo yahimbye zo gukangurira abahemutse kwihana no kongera gukunda ndetse n'izo kwifatanya n'abasigaye mu kababaro no kubaherekeza mu rugendo rw'Imbabazi n'Ubwiyunge akaba yaracyise " AKIRA URU RWANDA MANA IHORAHO"

Gahunda iracyari yayindi, Igitaramo kizabera muri Chapelle y'ishuri rya Lycee Notre dame de Citeaux i Kigali, kuri iki Cyumweru tariki ya 11 Mata 2010,guhera i saa kumi n'ebyiri z'umugoroba (6 PM).

Nyuma y'igice cya mbere kizaba kigizwe n'indirimbo, imivugo ndetse n'ubuhamya, hakazakurikiraho Missa yo gusabira abitabye Imana bose mu gihe cya Jenoside.

Ibindi biteganijwe :

1. Abifuza kwitabira iki gitaramo bagomba kuhagera bitarenze saa kumi n'imwe na mirongo ine (5h40 PM) kugirango hatazagira ikibacika.
2. Kwinjira ni UBUNTU, ariko hagati mu gitaramo, hazakusanywa amafaranga yo gufasha mu kwishyura ibyakoreshejwe mu kugitegura bityo buri wese akaba azasabwa kwitanga uko ashoboye

Kizito Mihigo akaba yongera gusubiramo ubu butumwa aho agira ati:

"Mu mwijima twabonye, dushobora kuhakura urumuri rw'isi. Mu bubabare twabayemo, dushobora kuhavana ukwizera kw'abantu bose"